TARGET ni KA REX CAYANONG

SA gitna ng mga balitang madalas puno ng sigalot at pangamba, may mga kwentong tahimik ngunit makapangyarihan—mga kwentong nagpapaalala kung para kanino at para saan ang serbisyo publiko.

Isa na rito ang paggawad ng ₱766,000 Institutional Partnership Program (IPP) grant ng Philippine Charity Sweepstakes Office (PCSO) Negros Occidental Branch sa Negrosanon Young Leaders Institute (NYLI) noong Enero 26, 2026.

Hindi lamang ito paglipat ng tseke, isa itong malinaw na pahayag ng malasakit.

Ang NYLI ay hindi karaniwang organisasyon. Ito ay tahanan ng pag-asa para sa mga sektor na madalas napag-iiwanan, mga kabataang nakaranas ng pang-aabuso, kapabayaan, karahasan, at pagsasamantala.

Kaya sa pamamagitan ng edukasyon, adbokasiya sa karapatang pantao, pangangalaga sa kalikasan, at serbisyong pangkalusugan, tinutulungan ng institusyon ang kanilang mga benepisyaryo na muling buuin ang sarili at ang kinabukasan na minsang ninakaw sa kanila.

Sa kasalukuyan, 260 indibidwal ang inaaruga ng NYLI, mga buhay na patunay na ang sugat ng nakaraan ay maaaring paghilumin sa tulong ng tamang gabay at suporta.

Sa pondong ipinagkaloob sa ilalim ng IPP, mapapalawak pa ang kanilang mga programa para sa mental wellness at recovery, isang aspeto ng kalusugan na madalas isinasantabi ngunit napakahalaga sa tunay na pagbangon.

Hindi rin matatawaran ang kahalagahan ng presensya nina Margaret de Asis, Jomar Borromeo, at Kevin Gaitan sa turnover.

Sila ang mukha ng isang institusyong hindi sumusuko—mga lider na naniniwalang ang malasakit ay dapat isinasalin sa kongkretong aksyon.

Ang kanilang pagtanggap sa tulong ay simbolo ng pananagutan na ang bawat pisong ipinagkaloob ay magiging binhi ng pagbabago.

Sinasabing ang Institutional Partnership Program ng PCSO ay patunay na ang kawanggawa ay hindi basta donasyon, kundi pamumuhunan sa tao.

Sa ilalim ng direktiba ni Pangulong Ferdinand Marcos Jr., malinaw ang direksyon na sa Bagong Pilipinas ay may puwang ang mga inisyatibang inuuna ang dignidad, kalusugan, at kinabukasan ng mamamayan.

Malinaw din ang mensahe na sa bawat taya ay may kawanggawa.

At sa bawat tulong na umaabot sa mga institusyong tulad ng NYLI, mas nagiging totoo ang pangarap ng isang lipunang may malasakit, may pag-asa, at may pagkakataon para sa lahat.